Beinn hagur fyrirtækja af líkamsrækt starfsmannaFærð hafa verið að því gild rök að fólk sem stundar reglubundna líkamsþjálfun hafi betra sjálfsmat en kyrrsetufólk, sé þar af leiðandi jákvæðara. Það eigi auðveldara með að tileinka sér nýja þekkingu, sé heilsuhraustara og sjaldnar fjarverandi vegna veikinda, sé orku- og afkastameira, líði betur í vinnunni, sé jákvæðara í garð breytinga og svo mætti lengi telja. Kostir þess að hafa starfsmenn sem eru í góðu líkamlegu formi eru það skýrir að vinnuveitendur hvetja í æ ríkara mæli starfsfólk sitt til líkamsþjálfunar, margir hverjir hvetja meira að segja starfsmenn sína til þjálfunar á vinnutíma til að tryggja enn frekari árangur (t.d. Baugur). Enn aðrir hafa komið fyrir aðstöðu til þjálfunar innan fyrirtækjanna (Marel, Sjóvá og fyrirhugaður er æfingasalur i nýju húsnæði Samskipa). Einnig færist í vöxt að fyrirtæki hleypi af stokkunum heilsuátaki um lengri eða skemmri tíma til að hvetja starfsmenn sína áfram í leið sinni að léttara lífi (Síminn, KPMG).
Tölulegur ávinningur
Ekki eru til íslenskar rannsóknir á beinum hag fyrirtækja af því að hvetja til þjálfunar starfsmanna en erlend stórfyrirtæki hafa birt tölur sem sýna á óyggjandi hátt hverju slík hvatning hefur skilað.
• Dupont merkti 47,5% færri fjarvistir frá vinnu hjá þeim sem tóku þátt í umfangsmiklu heilsuátaki á vegum fyrirtækisins yfir sex ára tímabil. Þessir sömu starfsmenn nýttu 14% færri veikindadaga en þeir sem ekki tóku þátt í átakinu – í heild hátt í 12000 færri veikindadagar yfir sama tímabil.
• Rannsókn sem birt var í tímaritinu Ergonomics sýndi að þeir sem eru í líkamlega góðu formi eru nákvæmari og hæfari starfsmenn en þeir sem ekki eru vel á sig komnir. Rannsóknin leiddi í ljós að þeir sem ertu í góðu líkamlegu formi gerðu 27% færri villur, samanborið við þá starfsmenn sem ekki voru í góðu formi, í verkefnum sem kröfðust einbeitingar og notkunar skammtímaminnis.
• Rannsókn á 80 háttsettum stjórnendum sem náði yfir 9 mánaða tímabil sýndi að þeir sem æfðu reglulega bættu líkamsástandið um 22% á tímabilinu . Auk þess bættu þeir getuna til að taka flóknar ákvarðanir um 70% samanborið við þá stjórnendur sem ekki stunduðu líkamsþjálfun.
• Kanadíska líftryggingafélagið staðhæfir að 63% þeirra sem stunda reglubundna þjálfun telji sig minna stressaða, síður þreytta og þolinmóðari í vinnunni. 47% töldu sig meira með á nótunum, hafa myndað betri tengsl við yfirmenn og samstarfsfólk og væru þegar á heildina er litið ánægðari í vinnunni. Af þessu má merkja að þjálfun hefur jákvæð áhrif á lífsviðhorf og samskipti.
• 75% starfsmanna Union Pacific járnbrautanna telja að reglubundin þjálfun bæti einbeitinguna og auki almenn afköst í starfi.
• General Motors sá 50% fækkun á starfstengdum umkvörtunarefnum og smáóhöppum við störf og 40% færri fjarvistir hjá þeim starfsmönnum sem stunduðu reglubundna líkamlega hreyfingu samanborið við hina sem ekkert hreyfðu sig.
• Coors bjórframleiðandinn reiknaði út að hver dollari sem þeir verja til líkamsþjálfunar starfsmanna skili sér sexfalt til baka inn í fyrirtækið (fyrir hvern $1 fengu þeir $6,15 til baka). Önnur stórfyrirtæki, þ.á m. General Mills og Motorola telja þetta hlutfall 1:3.
(Jim Loehr og Tony Schwartz. 2004. The Power of Full Engagement. NY. Free Press.)
Aukin framleiðni og betra andrúmsloft á vinnustað
Auðvelt er að mæla beinan hagnað fyrirtækja af færri veikindadögum starfsmanna. Erfiðara er að mæla beina aukningu á framleiðni hvers starfsmanns í kjölfar reglubundinnar líkamsþjálfunar en ljóst er að aukning á framleiðni starfsmanna hefur mikil áhrif á arðsemi fyrirtækja. Markviss hvatning til þjálfunar starfsmanna bætir andrúmsloftið á vinnustaðnum þar sem þeim starfsmönnum sem stunda þjálfun líður betur, eru bæði ánægðari með sjálfa sig og ekki síst fyrirtækið sjálft. Slíkt leiðir til jákvæðari, kraftmeiri og afkastameiri vinnustaðar sem styrkir fyrirtækið og gerir það líklegra til velgengni. Heilbrigðir starfsmenn vinna betur fyrir fyrirtækið og með því og eru því ávinningur fyrir fyrirtækið.
Fyrirtækinu helst betur á starfsfólki
Heilbrigðir starfsmenn eru hamingjusamir starfsmenn. Og þeir starfsmenn sem eru ánægðir í vinnunni eru líklegir til að verða tryggir starfsmenn í lengri tíma. Því heilbrigðari og hamingjusamari sem starfsmennirnir eru því minni peningum þarf fyrirtækið að verja til að ráða og þjálfa nýtt starfsfólk. Þessi staðreynd er mikilvæg í veruleika fyrirtækja í dag þar sem líftími starfsmanna í starfi styttist sífellt og „hausaveiðar“ verða stöðugt algengari.
Í raun má líta á sem svo að þeir starfsmenn sem stunda reglubundna líkamsrækt séu að skapa sjálfum sér og fyrirtækjum sínum peninga með því rækta líkamann og um leið sálina. Það er hagur vinnuveitenda að stuðla að og hvetja sína starfsmenn til að lifa heilbrigðu lífi og benda þeim á tengsl þjálfunar og frammistöðu í starfi. Starfsmenn sem eru við góða heilsu byggja upp fyrirtæki „við góða heilsu“. Fjárfesting í líkamsrækt starfsmanna er arðbær fjárfesting.
Texti í ramma:
47,5% færri fjarvistir
12.000 færri veikindadagar
27% færri villur í starfi
70% hæfari til að taka flóknar ákvarðanir
63% minna stress og þreyta
47% jákvæðari í samskiptum og lífsviðhorfum
50% lækkun á starfstengdum kvörtunum
Hver dollari sem varið er til þjálfunar starfsmanna skilar sér allt að sexfalt til baka
Unnur Valborg Hilmarsdóttir,
Höfundur er framkvæmdastjóri Dale Carnegie Íslandi.
